សង្គមស៊ីវិលគាំទ្រឲ្យមានការស៊ើបអង្កេតជុំវិញការចោទប្រកាន់អំពើពុករលួយក្នុងតុលាការខ្មែរក្រហម
មជ្ឈមណ្ឌល សិទ្ធិមនុស្សកម្ពុជាបានចេញសេចក្តីថ្លែងការណ៍មួយគាំទ្រសហមេធាវី បរទេសរបស់លោក នួន ជា ដែលបានទាមទារឲ្យតុលាការក្រុងភ្នំពេញបើកការស៊ើបអង្កេតលើសំណុំរឿង ពុករលួយនៅសាលាក្ដីខ្មែរក្រហមនៅថ្ងៃទី១២ មករានេះ ដោយចាត់ទុកសេចក្ដីថ្លែងការណ៍នាពេលថ្មីៗនេះរបស់សាលាក្ដីខ្មែរ ក្រហមនោះថាបានគំរាមកំហែងដល់សហមេធាវីនោះ។ប្រធានមជ្ឈមណ្ឌល សិទ្ធិមនុស្សកម្ពុជា គឺលោក អ៊ូ វីរៈ បានថ្លែងឲ្យដឹងថា តុលាការក្រុងភ្នំពេញគួរតែបើកការស៊ើបអង្កេតរឿងនេះឲ្យបាន ច្បាស់លាស់ និងដើម្បីឆ្លុះបញ្ចាំងពីសាលាក្ដីកាត់ទោសខ្មែរក្រហមនោះជាតុលាការ ដែលឯករាជ្យ ហើយការរារាំងនិងគំរាមកំហែងមិនឲ្យលើកឡើងអំពីអំពើពុករលួយនៅ ក្នុងសាលាក្ដីនោះជារឿងមួយមិនជួយដល់កម្ពុជានោះទេ។លោក អ៊ូ វីរៈ បានមានប្រសាសន៍ថា ៖ «ការគំរាមកំហែងនេះវាប៉ះពាល់ ហើយធម្មតា។ ទី២ វាធ្វើឲ្យអ្នកដទៃទៀតដែលមានព័ត៌មានទាក់ទងរឿងអំពើពុករលួយមាន ការភ័យខ្លាច គឺអនុញ្ញាត គឺអនុញ្ញាតឲ្យអំពើពុករលួយ អំពើមិនសមរម្យនៅក្នុងប្រព័ន្ធតុលាការទាំងមូលនៅតែបន្ត ហើយបុគ្គលមួយចំនួនយល់ថាខ្លួនអត់មាននរណាប៉ះពាល់គេបានទេ ធ្វើឲ្យអំពើពុករលួយ អំពើមិនមានការទទួលខុសត្រូវហ្នឹងនៅតែបន្ត ហើយធ្វើឲ្យបុគ្គលមួយចំនួនផ្សេងទៀត កាន់តែចង់ចូលរួមក្នុងការពុករលួយនេះដែរ។ អាហ្នឹងខ្ញុំថាជារឿងមួយជួយជំរុញឲ្យប្រព័ន្ធតុលាការនេះមាន ការទុកចិត្តពីប្រជាពលរដ្ឋនិងមានការទទួលស្គាល់ពីប្រជាពលរដ្ឋដែលជា ជនរងគ្រោះនៅជំនាន់ខ្មែរក្រហម»។អ្នកនាំពាក្យសាលាក្តីកាត់ទោសខ្មែរក្រហម គឺលោក រាជ សម្បត្តិ បានមានប្រតិកម្មនឹងការលើកឡើងរបស់មជ្ឈមណ្ឌលសិទ្ធិមនុស្សថា សាលាក្តីមានគណៈកម្មការត្រួតពិនិត្យច្បាស់លាស់។លោក រាជ សម្បត្តិ បានបញ្ជាក់ថា ៖ «គ្រាន់តែ ថាអ្វីដែលមេធាវីបានលើកឡើង យករឿងទៅដាក់តុលាការហ្នឹង អាហ្នឹងវាជារឿងហួសសម័យទៅហើយ។ រឿងហ្នឹងគេមានគណៈកម្មការក្រមសីលធម៌ដើម្បីត្រួតពិនិត្យកិច្ចការ ហ្នឹង មានប្រអប់សំបុត្រមានអីសម្រាប់បុគ្គលិកដាក់នៅក្នុងប្រអប់ ហើយប្រធានការិយាល័យរដ្ឋបាលក៏បានជួបបុគ្គលិកប្រាប់អស់ហើយកាលពីខែ ៨ ២០០៨ហ្នឹង»។ទោះជាយ៉ាងណា លោក អ៊ូ វីរៈ លើកឡើងទៀតថា ប្រសិនបើតុលាការក្រុងភ្នំពេញមិនស៊ើបអង្កេតលើបញ្ហានេះឲ្យបាន ច្បាស់លាស់ទេនោះ ក្តីសង្ឃឹមរបស់ប្រជាពលរដ្ឋខ្មែរពីមុនមកនិងត្រូវបាត់បង់ហើយ ការចំណាយថវិកាលើសាលាក្តីនោះមិនបានរកយុត្តិធម៌ជូនពលរដ្ឋកម្ពុជា ទេ។លោក អ៊ូ វីរៈ បានមានប្រសាសន៍ថា ៖ «តុលាការគ្រប់ជាន់ថ្នាក់ ទាំងអស់មិនយកចិត្តទុកដាក់ អាហ្នឹងគឺឆ្លុះបញ្ចាំងអ៊ីចឹង ហើយបើឆ្លុះបញ្ចាំងអ៊ីចឹងបានន័យថា តុលាការ ចៅក្រម ឬមួយមន្រ្តីហ្នឹងគឺនៅតែទទួលសំណូក នៅតែជាតុលាការដុល្លារ តុលាការលុយដដែល មិនមែនជាតុលាការយុត្តិធម៌ទេ»។សូមជម្រាបថា សហមេធាវីបរទេសនោះបានដាក់ពាក្យបណ្តឹងទៅអយ្យការក្រុងភ្នំពេញកាលពី ថ្ងៃទី៨ ខែមករាកន្លងទៅនេះ ដោយដើមបណ្តឹងបានប្រកាសខ្លួនថាជាជនរងគ្រោះនៃការរំលោភច្បាប់ ព្រហ្មទណ្ឌអ៊ុនតាក់ឆ្នាំ១៩៩២ ជាពិសេសដើមបណ្តឹងចោទប្រកាន់អំពើពុករលួយក្នុងស្ថាប័នកាត់ទោស ខ្មែរក្រហមថា អាចធ្វើឲ្យអន្តរាយដល់សិទ្ធិជាមូលដ្ឋានក្នុងការទទួលបាននូវ ការជំនុំជម្រះក្តីប្រកបដោយយុត្តិធម៌៕
No comments:
Post a Comment